8-15 ივლისს, სომხეთის დედაქალაქ ერევანში კინოფესტივალი „ოქროს გარგარი“ იმართება, რომელიც სამხრეთ კავკასიის რეგიონში ერთ-ერთი ყველაზე მნიშვნელოვანი კინომოვლენაა. ფესტივალის ფარგლებში ორგანიზებულ სექციაში Directors Across Border (10-12 ივლისი) კო-პროდუქციის ფორუმზე წარმოდგენილი იყო ორი ქართული პროექტი ნანა ჯანელიძის „სხვა სამოთხე“ და ქეთი მაჭავარიანის „ხელები მაღლა“. ფორმუზე და პანელ დისკუსიაში მონაწილეობის მისაღებად მიწვეული იყო ეროვნული კინოცენტრის წარმომადგენელი სალომე სეფაშვილი.

უკვე ცნობილია, რომ DAB-ის ფორუმზე საუკეთესო პროექტისთვის (Best Project/Pitch Award) მთავარი ჯილდო პროექტის „ხელები მაღლა“ შემდგომი განვითარებისთვის 5000 ევროს ოდენობით მიიღო ქეთი მაჭავარიანმა.

DAB-ის კოპროდუქციის ფორუმის მიზანია DAB-ის მონაწილე ქვეყნებიდან (სომხეთი, აზერბაიჯანი, ბელარუსი, საქართველო, მოლდოვა და უკრაინა) ტალანტების ხელშეწყობა და მათ შორის კოპროდუქციის წახალისება.

ფესტივალის ფარგლებში მოკლემეტრაჟიანი ფილმების კონკურსისთვის შეირჩა კოტე ჩლაიძის ფილმი „მირზას დაბადების დღე“. დოკუმენტური ფილმების კონკურსში კი წარმოდგენილია სალომე ჯაშის ფილმი „ბახმარო“. ამ სექციის ჟიურის ერთ-ერთი წევრი - ნანა ჯანელიძეა.

ფესტივალის ფარგლებში ასევე იმართება ელდარ შენგელაიას ფილმების რეტროსპექტივა, რომელსაც საპატიო სტუმრის სტატუსით თავად რეჟისორიც ესწრება.